Cent ans d'esquí ena Val d'Aran

Eth ligam entre era Val d’Aran e er esquí ei fòrça mès prigond qu’er usatge recreatiu e esportiu d’aué. Quan parlam dera istòria de l’esquí en país, tanben ac hèm de cambiament sociau, economic, d’usatges e d’estils de vida en comunitats que demorauen isolades pendent ua grana part der an e en economies locaus que non podien auançar a causa des condicions extrèmes. Era irrupcion der esquí suposèc, per tant, ua demorada revolucion. Un libre d’Andrèu Pujol e Juli Sala.

100 ans d’esquí

Eth dia 9 de març de 1919 tres excursionistes deth Centre Excursionista de Catalonha, Lluís Estasen, Josep M. Soler Coll e Pau Badia, per encomana dera Mancomunitat de Catalonha, pugen a pè e damb esquís eth Pòrt dera Bonaigua, peth camin que ven d’Esterri, e atau entre er esquí ena Val d’Aran. Eth dia 11 de març, en Pla de Beret, es tres esquiaires deth CEC repartissen esquís as aranesi. Esquís qu’era Mancomunitat de Catalonha obsequie as ajuntaments dera Val d’Aran.

A prumèra ora quate vesins de Bargergue e dus de Salardú se caucen damb es esquís, e son fotografiadi per Josep Ma. Soler. A miei maitin s’ahigen dotze òmes de Montgarri. Toti practiquen enquiara tarde, e ar acabar toti tornen en casa, a on arriben de net. Es practiques venentes seràn en Salardú, enes madeishi carrèrs deth pòble e en un prat d’apròp. Assistissen 20 abitants de Salardú e Tredòs. Un des parelhs d’esquís va tà mans de Manuel Moga, de Bagergue, un des assistents mès arderosi as prumères practiques en Beret.

Es tres esquiaires deth CEC baishen pera carretèra entà Vielha, a on hèn practiques fòrça concorrudes en un prat, deth 17 enquiath 19 de març. Se lòtgen probablaments en casa de José M. España, conselhèr aranés dera Mancomunitat e patrocinador deth projècte amassa damb eth president Josep Puig i Cadafalch.

Estasen, escriuec e fotografièc era cronica d’aquera expedicion ena Val d’Aran. En Bulletin deth CEC escriuec “es aranesi … non solaments se profitaràn der esquí entà passar es pòrts e estauviar es sues vides, se non qu’eth futur pòt convertir era Val d’Aran en un magnific centre d’espòrts d’Iuèrn”. (Hònt: Conselh Generau d’Aran)

• Autors: Andrèu Pujol e Juli Sala
• ISBN: 978-84-09-23534-6
• 91 pagines
• Tampa rustica
• 170 x 240 mm
• IEA-AALO. Colleccion Istòria, patrimòni e identitat
• Data de publicacion: Octobre 2020